عزیزیم كیمی گوزلر
تار چالان كیمی گوزلر
قاشون كیمی قاش اولماز
گوزلرین كیمی گوزلر

بو داغدا مهلر گلر
داغلاری انر گلر
نامرده توش اولانین
باشینه نهلر گلر؟

بو داغدا اكدیم اكین
آلدیلر الیمده كین
هیچ كافر هیچ مسلمان
اولماسین منیم تكین

بیر قوش گلیر آغ داشدان
خبر ویریر قارداشدان
قارداش باجیدان دویسا
باجی دویماز قارداشدان

بو گلن اوزون بیلمز
دانشسا سوزون بیلمز
هر گلیب سو دولدوران
چشمه نین گوزون بیلمز

بوستانام تاغیم آغلار
غمدن یاپراغیم آغلار
ساغام اوزوم آغلارام
اولسم توپراغیم آغلار

بو دره نارین دره
گیتدیكجه نارین دره
بوردا بر باغ سالدیم
یار گله نارین دره

آی چیقدی قادر آللاه
تقصیریم نه در آللاه
یا منیم سووگولیمی
یا منی ئولدور آللاه

آغ آلما قیزیل آلما
نیمچه یه دوزول آلما
چیركین آل نجیب اولسون
بد اصیل گؤزهل آلما

عزیزیم آپار منی
گول ائله آپار منی
ائل یولوندا ایتمیشم
ایتیرن تاپار منی

آجیخان چؤرک ایستر
قار توکن کورک ایستر
ظالیمین إوین ییخماق
بیر بؤیوک اوره گ ایستر

بوداغلار قار اولایدی
باهاری وار اولایدی
چوخدان گؤزوم یولدادی
اول گلن یار اولایدی

بوداغلاردان آشارام
سئل تک دولوب داشارام
وطنیمه یئتیشسم
ایللر بویو یاشارام

چتین گونده دوزه رم
دوستاقلاری چکه رم
وطنیمه یئتیشسم
توپراقینی اوپه رم

قارانلیقدان قاچارام
گؤنشه یول آچارام
وطن آدی گلنده
آدینا گول ساچارام

اوزان بیلر ساز نه دی
نازسیز بیلر ناز نه دی
باغبان آرزی سین چکر
بولبول بیلر یاز نه دی

عزیزیم آنا دیلیم
مین دئیه ر جانا دیلیم
زامان سیخیب بوغسادا
قویمارام یانا دیلیم

عزیزیه م او خاندان
او سلطاندان او خاندان
بیردسته گول اولایدیم
آسیلیردیم یاخاندان

بویان باغچا اویان گول
نه یاتمیسان اویان گول
اؤپوم او گوزلروندن
سن یوخودان اویان گول

خنجری ایشله یوللا
اوستون گوموشله یوللا
منه بئش آلما گوندر
بیرینی دیشله یوللا

حیرانین یوللاریندا
بند اولدوم یوللاریندا
بیرجوت قولباغ اولایدیم
یاریمین قوللاریندا
برچسب ها:
بایاتی،
بایاتی لار،
روستای انگشتجان،
وبلاگ انگشتجان،